Այսօր Արատեսից վերադարձավ օգոստոսի 17-ից այնտեղ աշխատանքներ կատարող հերթական աշխատանքային խումբը: Մեզ առաջադրված աշխատանքները կատարեցինք բարեխղճորեն և հասցրիք տրամբանական ավարտին: Աշխատանքի հետ համատեղելով ճամբարային հագեցած առօրյան, ժամանակը այնպես օգտագործեցինք, որ յուրաքանչյուր պահից հաճույք ստանանք, քանի որ Արատեսը իսկապես դրախտավայր է և այնտեղ ձանձրանալն ուղղակի անհնար է, նամանավանդ պրպտուն միտք ունեցողների համար:
Աղբից և ոչ պիտանի գույքից մաքրեցինք ևս երկու կացարան: Բակային տարածքներից քաղեցինք և հավաքեցինք չորացած խոտածածկույթը, որը ոչ միայն տգեղ էր, այլ իրական վտանգ էր ներկայացնում հրդեհի համար: Նաև հեռացրինք այդ տներին հարող բոլոր տեսակի ցանկապատերը: Քանդված շինություններից մնացած փայտանյութերը տեղափոխեցինք դրանց համար նախատեսված վայրը: Խմբի մեջ ընդգրկված աղջիկներն էլ Արատես դպրական կենտրոն նախագծի անդամ Անուշ Համբարյանի գլխավորությամբ թե համեղ ճաշատեսակներ պատրաստեցին, թե օգնեցին մեզ այլ գործերում:
Աշխատանքներից անմասն չմնաց նաև մեզ Արատես տեղափոխող միկրոավտոբուսի վարորդ Արթուրը, ով իր գործը պրոֆեսիոնալ կատարելուց բացի, օգնեց բոլոր տեսակի գործերում։
ԱՐԱՏԵՍԻ ԴՊՐԱԿԱՆ ԿԵՆՏՐՈՆ 