Վայոց Ձորի մարզի Արատես վայրում հանդիսավոր միջոցառմամբ տեղի է ունեցել դպրական կենտրոնի բացում, որը Երևանի «Մխիթար Սեբաստացի» կրթահամալիրի նախաձեռնությունն է:
Բնության գրկում շուրջտարյա կենտրոնը աշակերտներին և ուսուցիչներին կապահովի ոչ միայն բնության գրկում ճամբարային կացարաններով, այլև սերտ կապ է ստեղծում հազարամյակների պատմամշակութային ժառանգության հետ:
Այնտեղ են 10-13դդ Արատեսի վանքը, 10-րդ դարի ՍԲ Սիոն, 11-րդ դարի ՍԲ Աստվածածին եկեղեցիները, 10-16դդ խաչքարեր և բազմաթիվ այլ պատմական արժեքներ:
Արատեսի նախկին ադրբեջանաբնակ տարածքը 1990 թվականից տրամադրվել է «Մխիթար Սեբաստացի» կրթահամալիրին՝ դպրական կենտրոն կառուցելու նպատակով։
Դպրոցի ուսուցիչներից, սովորողներից կազմված ջոկատների, մասնագիտական խմբերի պարբերաբար այցերի ու մաքրման, վերանորոգման աշխատանքների շնորհիվ այսօր արդեն Արատեսն իր տարածքով ավելի բարեկարգ է ու կեցության համար պիտանի, վերանորոգվում ու վերակառուցվում են գյուղի տներն ու վերածվում ճամբարի։
Դպրոց բնության գրկում նախագծի կենտրոնում նաև Արատեսի վանքի վերականգնման նախագիծն է։ Վանքի նախնական տեսքը վերարտադրելու նպատակով Արատեսում 90-ական թվականներին ուսումնասիրություններ են անցկացրել ճարտարապետներ Սամվել Այվազյանը, Ամիրան Բադիշյանը, Մանուշակ Տիտանյանը: Միջոցների բացակայության պատճառով վերականգնումը, սակայն, չի իրականացվել:
Կազմված նախագծերը այսօր շնորհանդեսային ներկայացմամբ հանրայնացվել են: Ճարտարապես Սամվել Այվազյանը մանրամասն ներկայացրել է աշխատանքներն ու առանձնացրել հատկապես վանքի հորինվածքի աննախադեպ ճարտարապետական լուծումը, որը հնարավորություն է տվել վանքի ներսում խնայել մեծ տարածք և խուսափել լայնադիր սյուներից:
Արատեսում արդեն գործում է նաև վրանային ճամբար՝ ուսումնամարզական ու տարատեսակ հավաքներ ընդունելու համար։ Կլինի արվեստանոց փորձառու և սկսնակ ճարտարապետների համար։
Սեպտեմբերի 14-ից այնտեղ կլինի նաև եռօրյա ռազմամարզական հավաք, որին կմասնակցեն կրթահամալիրի և Եղեգիսի դպրոցի պատանիները: Իսկ սեպտեմբերի 21-ին կրթահամալիրի համար ավանդական դարձած բարձունքի հաղթահարումը կանցկացվի հենց Արատեսում. կմասնակցեն կրթահամալիրի հայրենագետներն իրենց հասակակից եղեգիսցիների հետ միասին:
Նյութի աղբյուրը՝ SHANTNEWS.am
ԱՐԱՏԵՍԻ ԴՊՐԱԿԱՆ ԿԵՆՏՐՈՆ 