Երեկ Արատեսի դպրական կենտրոնից վերադարձավ ևս մեկ աշխատանքային-արշավախմբային խումբ: Խմբի անդամները ինչպես ուսուցիչներ, այնպես էլ սովորողներ էին: Արատեսում շարունակեցինք մաքրման, հարդարման աշխատանքները, ինչպես նաև տեղադրեցինք մեկ միջին չափի վրան, մեր ավագ ընկեր Գայ Օհանյանի հայտնաբերած աղբյուր տանող ճանապարհը մաքրեցինք խոտածածկից և այն դարձրինք ավելի մատչելի-անցանելի: Աշխատանքային խմբով հավաքեցինք կացարանների բակերում և Արատեսի վանքի շրջակայքում հնձված խոտը: Նաև տներից մեկի սենյակում տեղադրեցինք զինվորական երկաթե մահճակալներ՝ իրենց ներքնակներով, վերմակներով և բարձերով:
Տանիքների վերանորոգման և նոր թիթեղյա ծածկով փոխարինման աշխատանքները ընթացքի մեջ են: Շինարարները ջանք ու եռանդ չեն խնայում գործը արագ և որակով կատարելու հարցում:
Մեզ այցելեցին Վայոց ձորի մարզային երիտասարդական կառույցի անդամները՝ ղեկավար Հասմիկ Մարգարյանի գլխավորությամբ, ինչպես նաև Վայոց ձորի մարզպետարանի աշխատակազմի կրթության, մշակույթի և սպորտի վարչության պետ Արփիար Ղազարյանը: Վերջինս բարձր գանահատականի արժանացրեց կատարված և կատարվելիք աշխատանքները, դպրական կենտրոնը վերականգնելու գործը և իր աջակցությունը հայտնեց այդ կարևոր գործին:
Աշխատանքներից բացի խմբի անդամներով արշավներ կազմակերպեցինք Արատեսի դրախտային վայրեր, լողացանք զուլալ գետում, իսկ Երևան վերադառնալիս այցելեցինք Եղեգիսի Զորաց եկեղեցի:
ԱՐԱՏԵՍԻ ԴՊՐԱԿԱՆ ԿԵՆՏՐՈՆ 